新聞日期
旧巴士唔行得，唔代表无用㗎。黛安收到风，最近九巴透过旧巴士及退役巴士捐赠计划，喺7月捐咗4架退役巴士畀四间中小学，呢几间学校仲将巴士改做另类学习天地，从中提升学生嘅学习兴趣。
例如东华三院马锦灿纪念小学就将巴士改装成「创游。梦想空间」，入面放满好多桌上游戏，等同学仔可以玩游戏放松之余，仲可以用课堂所学嘅知识设计游戏。而港澳信义会明道小学就计划将巴士上层改成「STEM之太阳能研究中心」；巴士下层就变成「好快乐阅读廊」，为同学仔提供创意教室，提升佢哋阅读乐趣。
至于金钱村何东学校就谂住将巴士上层变做多元活动空间，有唔同主题实验工具，等学生可以动手做下小实验；下层就做玩具图书馆，用多款益智玩具畀学生从游戏中学习。明爱马鞍山中学就会将巴士变成教导生命意义嘅学习场所，用到VR同AR技术，培养学生正向人生价值观。学校用巴士做小课室真系好有趣，而且仲好有意义！
数据源︰晴报