新聞日期
舊巴士唔行得，唔代表無用㗎。黛安收到風，最近九巴透過舊巴士及退役巴士捐贈計劃，喺7月捐咗4架退役巴士畀四間中小學，呢幾間學校仲將巴士改做另類學習天地，從中提升學生嘅學習興趣。
例如東華三院馬錦燦紀念小學就將巴士改裝成「創遊。夢想空間」，入面放滿好多桌上遊戲，等同學仔可以玩遊戲放鬆之餘，仲可以用課堂所學嘅知識設計遊戲。而港澳信義會明道小學就計劃將巴士上層改成「STEM之太陽能研究中心」；巴士下層就變成「好快樂閱讀廊」，為同學仔提供創意教室，提升佢哋閱讀樂趣。
至於金錢村何東學校就諗住將巴士上層變做多元活動空間，有唔同主題實驗工具，等學生可以動手做下小實驗；下層就做玩具圖書館，用多款益智玩具畀學生從遊戲中學習。明愛馬鞍山中學就會將巴士變成教導生命意義嘅學習場所，用到VR同AR技術，培養學生正向人生價值觀。學校用巴士做小課室真係好有趣，而且仲好有意義！
資料來源︰晴報